Claire White

Claire White

Claire White kemur á Vöku m.a. til að kenna nemendum Tónlistarskólans á Akureyri þjóðlagatónlist frá Hjaltlandseyjum. Námskeiðin verða miðvikudag, fimmtudag og föstudag kl. 14:30-15:30 fyrir yngri nemendur og 15:30-16:30 fyrir eldri nemendur.

Claire verður með tónleika á Síldarminjasafninu á Siglufirði miðvikudagskvöldið 30. maí og á Gamla bauk á Húsavík fimmtudagskvöldið 31. maí. Auk þess kemur hún fram á lokatónleikum Vöku, laugardagskvöldið 2. júní í Hömrum í Hofi.

Claire White er þjóðlagafiðluleikari og söngvaskáld frá Hjaltlandseyjum sem hefur hlotið fjölda verðlauna fyrir tónlista sína. Hún lærði hjá Dr. Tom Anderson sem er þekktasti og færasti þjóðlagafiðlari, tónskáld og kennari Hjaltlandseyja.

Undanfarin 20 ár hefur Claire starfað sem kennari og hljóðfæraleikari víðs vegar um heiminn og kemur bæði fram sem einleikari og í tónlistarhópunum Blyde Lasses, Hjaltibonhoga og Danse McCabre Ceilidh Band. Claire hefur farið í tónleikaferðalög til Ástralíu, Nýja-Sjálands, Sameinuðu arabísku furstadæmanna, Kanada, Sardiníu, Noregs, Slóveníu, Eistlands, Póllands, Írlands og Íslands.

Claire býr í gömlu húsi við hafið þangað sem hún sækir sköpunarkraft sinn og fylgist með auðugu dýralífi Hjaltlandseyja.